ភ្នំពេញ៖ គណៈកម្មាធិការសិទ្ធិមនុស្សកម្ពុជាបានដាក់ឱ្យប្រើប្រាស់កម្មវិធីទូរសព្ទដៃ «CHRC App» ដើម្បីលើកកម្ពស់និងការការពារសិទ្ធិមនុស្សនៅកម្ពុជាឱ្យកាន់តែប្រសើរឡើង ក្រោមអធិបតីរដ្ឋមន្ត្រីប្រតិភូអមនាយករដ្ឋមន្ត្រី និងជាប្រជានគណៈកម្មាធិការសិទ្ធិមនុស្សកម្ពុជា លោក កែវ រ៉េមី នាព្រឹកថ្ងៃទី២៩ ខែមិថុនា ឆ្នាំ២០២៣។

លោក កែវ រ៉េមី បានបញ្ជាក់ថា កម្មវិធីអេឡិកត្រូនិកនេះ នឹងធ្វើឱ្យប្រជាពលរដ្ឋកាន់តែមានភាពងាយស្រួលក្នុងការ ទទួលបានព័ត៌មានថ្មីៗអំពីសិទ្ធិមនុស្ស ហើយក៏អាចតាមដានសកម្មភាពនានារបស់គណៈកម្មាធិការ សិទ្ធិមនុស្សកម្ពុជា ក៏ដូចជារាជរដ្ឋាភិបាលក្នុងការការពារ និងលើកកម្ពស់សិទ្ធិមនុស្សនៅកម្ពុជា។ លើសពីនេះទៅទៀត កម្មវិធីអេឡិកត្រូនិកនេះក៏ផ្ដល់លទ្ធភាពឱ្យប្រជាពលរដ្ឋពីគ្រប់ទិសទី និងគ្រប់មជ្ឈដ្ឋាន ទាំងអស់អាចដាក់ពាក្យបណ្តឹងពាក់ព័ន្ធនឹងការរំលោភបំពានសិទ្ធិមនុស្ស មកកាន់គណៈកម្មាធិការសិទ្ធិ មនុស្សកម្ពុជាកាន់តែមានភាពងាយស្រួលនិងឆាប់រហ័ស ដោយគ្រាន់តែចូលប្រើប្រាស់កម្មវិធីទូរស័ព្ទ របស់គណៈកម្មាធិការសិទ្ធិមនុស្សនេះ។

លោកថ្លែងថា៖ «កម្មវីធីអេឡិកត្រូនិកនេះ ក៏ជាផ្នែកមួយនៃការកែទម្រង់ការផ្ដល់ សេវាសាធារណៈប្រកបដោយនវានុវត្តន៍ ដែលជាការចូលរួមជាមួយរាជរដ្ឋាភិបាលក្នុងការជំរុញ និងពន្លឿនការប្រើប្រាស់បច្ចេកវិទ្យាឌីជីថល ដែលជាឃ្នាស់សម្រាប់ការអភិវឌ្ឍ ធានាអភិបាលកិច្ចល្អ និង បម្រើសេវាសាធារណៈឱ្យកាន់តែល្អប្រសើរ»។

លោក កែវ រ៉េមី រំពឹងថា តាមរយៈកម្មវិធីអេឡិកត្រូនិកថ្មីនេះ នឹងផ្ដល់ជាអត្ថប្រយោជន៍ជូនដល់ប្រជាពលរដ្ឋពីគ្រប់ទិសទី ឱ្យកាន់តែមានភាពងាយស្រួលក្នុងការតាមដានព័ត៌មានសិទ្ធិមនុស្ស អាចស្វែងយល់ពីការវិវឌ្ឍថ្មីៗ ស្ថានភាពសិទ្ធិមនុស្សនៅកម្ពុជា និងសមិទ្ធផលធំៗជាច្រើនរបស់រាជរដ្ឋាភិបាលក្នុងការការពារ និងលើក កម្ពស់សិទ្ធិមនុស្ស ហើយកាន់តែមានភាពឆាប់រហ័សក្នុងការរាយការណ៍ពីបញ្ហាសិទ្ធិមនុស្ស និងការដាក់ជូននូវបណ្ដឹងពាក់ព័ន្ធនឹងការរំលោភបំពានសិទ្ធិមនុស្ស មកកាន់គណៈកម្មាធិការសិទ្ធិមនុស្សកម្ពុជា។

ជាមួយគ្នានេះដែរលោកជឿដែរថា គ្រប់ក្រសួង ស្ថាប័ន និងភាគីពាក់ព័ន្ធទាំងអស់ នឹងបន្តកិច្ចសហការជាមួយគណៈកម្មាធិការសិទ្ធិមនុស្សកម្ពុជា ក្នុងបេសកកម្មការពារ និងលើកកម្ពស់ សិទ្ធិមនុស្សនៅកម្ពុជាឱ្យកាន់តែប្រសើរឡើង៕